کراچی میں تیسرے عالمی ثقافتی میلے کی تیاریاں آخری مرحلے میں داخل، غیرملکی فنکاروں کی آمد شروع

دارالحکومت کراچی میں تیسرے عالمی ثقافتی میلے 2026 کی تیاریاں آخری مرحلے میں داخل ہوگئی ہیں، جبکہ دنیا بھر سے غیرملکی فنکاروں اور مندوبین کی آمد بھی شروع ہوگئی ہے۔ آرٹس کونسل آف پاکستان کراچی کے زیرِ اہتمام منعقد ہونے والا یہ میلہ 29 اکتوبر سے 22 نومبر تک جاری رہے گا۔

25 روزہ عالمی ثقافتی میلے میں 150 ممالک سے ایک ہزار سے زائد غیرملکی فنکار شرکت کریں گے، جبکہ پاکستان کے 500 سے زائد فنکار بھی اپنی صلاحیتوں کا مظاہرہ کریں گے۔ اس بڑے ثقافتی اجتماع کے لیے کراچی کی اہم شاہراہوں پر تشہیری بل بورڈز بھی نصب کیے گئے ہیں۔

میلے میں موسیقی، تھیٹر، رقص، فلم، فنونِ لطیفہ اور دیگر تخلیقی شعبوں سے متعلق پروگرام پیش کیے جائیں گے۔ ان سرگرمیوں کے ذریعے شائقین کو مختلف ممالک کی ثقافتوں، روایات اور فنون کو قریب سے دیکھنے کا موقع ملے گا۔

منتظمین کے مطابق عالمی ثقافتی میلے کا مقصد فن اور تخلیقی سرگرمیوں کے ذریعے مختلف ممالک کے درمیان رابطوں اور ثقافتی تبادلے کو فروغ دینا ہے۔ اس پلیٹ فارم کے ذریعے دنیا بھر کے فنکاروں کو اپنی صلاحیتیں پیش کرنے اور ایک دوسرے کے تجربات سے سیکھنے کا موقع ملے گا۔

میلے کو پاکستان کا مثبت تشخص عالمی سطح پر اجاگر کرنے اور کراچی کو بین الاقوامی ثقافتی سرگرمیوں کے مرکز کے طور پر متعارف کرانے کی کوشش بھی قرار دیا جا رہا ہے۔