پانی کی شدید قلت اور ربیع کا آنے والا موسم

آنے والے ربیع کے موسم میں ملک کو تقریباً 20 سے 25 فیصد تک پانی کی قلت کا سامنا کرنے کا عندیہ دیا جا رہا ہے، جس کا سب سے پہلا اثر گندم کی فصل پر پڑنے کا امکان ہے۔ عام طور پر اس صورتحال کو اس انداز میں پیش کیا جاتا ہے جیسے یہ صرف دریاؤں میں پانی کے بہاؤ میں کمی کا نتیجہ ہو، لیکن حقیقت میں پوری صورتحال محض قدرتی بہاؤ میں کمی تک محدود نہیں۔ اس میں ڈیموں کو چلانے کے طریقۂ کار، یعنی آپریشنل نظام کی بعض کمزوریاں بھی شامل رہی ہیں۔

روزنامہ ’ڈان‘ کی رپورٹ اور سامنے آنے والے اعداد و شمار کے مطابق ملک اس مرتبہ تربیلا اور منگلا ڈیموں میں 9.5 ملین ایکڑ فٹ سے بھی کم پانی کے ذخیرے کے ساتھ ربیع کے موسم میں داخل ہو رہا ہے، جو 2021ء کے بعد ربیع کے آغاز پر موجود ذخیرے کا کم ترین حجم ہے۔ اس کا مطلب یہ ہے کہ جب یکم اکتوبر کو ربیع کا موسم شروع ہوگا تو ڈیموں میں پانی کا ذخیرہ 9.5 ملین ایکڑ فٹ سے کم ہوگا، جبکہ گزشتہ ربیع کا آغاز تقریباً 13 ملین ایکڑ فٹ کے ذخیرے کے ساتھ ہوا تھا۔

اسی رپورٹ میں یہ بات بھی سامنے آئی ہے کہ خریف کے اختتام پر 10 لاکھ، یعنی ایک ملین ایکڑ فٹ سے زیادہ پانی کسی واضح انتظامی ضرورت کے بغیر خارج کیا گیا۔ اس معاملے کا سنجیدگی سے جائزہ لینے کی ضرورت ہے۔ ہم جانتے ہیں کہ ارسا اور حکومتِ سندھ کے محکمہ آبپاشی کی جانب سے روزانہ پانی کے اعداد و شمار جاری کیے جاتے ہیں۔ ستمبر 2026ء میں جاری ہونے والے روزانہ ڈسچارج بلیٹن سے صورتحال خاصی واضح ہو جاتی ہے۔ جب تربیلا ڈیم اپنی زیادہ سے زیادہ ذخیرہ کرنے کی سطح، یعنی 1550 فٹ، سے نیچے آنا شروع ہوا تو اس کے باوجود وہاں سے صوبوں کی ضرورت سے زیادہ پانی خارج کیا جاتا رہا۔

یہ بات سمجھنے کی ضرورت ہے کہ تربیلا میں 1550 فٹ سے زیادہ پانی ذخیرہ نہیں کیا جا سکتا، لیکن اگر سطح اس حد سے نیچے ہو تو پانی کے اخراج کا فیصلہ ضرورت اور دستیاب ذخیرے کو مدنظر رکھ کر کیا جانا چاہیے۔ پنجاب دریائے سندھ سے اپنے حصے کا پانی چشمہ اور تونسہ سے نکلنے والی نہروں کے علاوہ سی جے اور ٹی پی لنک کینالز کے ذریعے پہلے ہی حاصل کر چکا تھا اور ستمبر میں بھی ان لنک کینالز میں پانی چلتا رہا۔ اس پانی کی وصولی کے باوجود دریا کے زیریں حصے میں اضافی پانی مسلسل بہتا رہا۔ یہ پانی دریا کا قدرتی بہاؤ نہیں تھا جسے مجبوری کے تحت آگے جانے دیا جائے، بلکہ یہ ذخیرے سے نکالا گیا پانی تھا۔

ستمبر کے آغاز تک تربیلا ڈیم 1550 فٹ کی زیادہ سے زیادہ سطح پر تھا۔ اس وقت سیلابی صورتحال کے باعث اضافی پانی کے بہاؤ کو روکنا تکنیکی طور پر ممکن نہیں تھا۔ اصل آپریشنل مسئلہ اس کے بعد سامنے آیا۔ ستمبر کے وسط کے بعد تربیلا میں پانی کی سطح کم ہونا شروع ہوئی اور اوپر سے آنے والا بہاؤ بھی گھٹتا گیا، لیکن زیریں جانب پانی کا اخراج زیادہ مقدار میں جاری رہا۔

دوسری جانب سندھ کی پانی کی طلب، یعنی انڈنٹ، ستمبر کے ہر گزرتے ہفتے میں کم ہوتی رہی، لیکن تربیلا اور چشمہ سے پانی کا اخراج اسی تناسب سے کم نہیں کیا گیا۔ مثال کے طور پر 13 ستمبر کو تربیلا میں پانی کی آمد 131,500 کیوسک تھی، جبکہ وہاں سے 155,000 کیوسک پانی خارج کیا جا رہا تھا۔ اس وقت سندھ کی طلب 135,000 کیوسک تھی، لیکن اس کے باوجود سندھ تک پہنچنے والا پانی اس کی طلب سے زیادہ تھا۔

21 ستمبر کو سندھ کی طلب کم ہو کر 115,000 کیوسک رہ گئی، لیکن تربیلا سے پانی کا اخراج بدستور 125,000 کیوسک رکھا گیا۔ اس روز سندھ تک پہنچنے والا اضافی پانی 27,000 کیوسک سے بھی زیادہ تھا۔ 22 ستمبر کو تربیلا میں پانی کی آمد مزید کم ہو کر 72,000 کیوسک رہ گئی، لیکن وہاں سے خارج ہونے والا پانی پھر بھی 125,000 کیوسک رکھا گیا۔

ان اعداد و شمار سے یہ سوال ضرور پیدا ہوتا ہے کہ کیا ڈیموں کو آنے والے موسم کے لیے پانی محفوظ رکھنے کی مناسب حکمت عملی کے تحت چلایا گیا؟ اگر پانی کی آمد مسلسل کم ہو رہی تھی تو ذخیرے سے اخراج اسی رفتار سے کم کیوں نہیں کیا گیا؟اس پورے عرصے میں پنجاب کی جانب سے دریائے سندھ سے پانی کا حصول بھی اس کی ضروریات کے مطابق جاری رہا۔ پنجاب کی جانب سے اپنے حصے کا پانی حاصل کرنے کے بعد جو پانی بچنا چاہیے تھا، اسے صوبوں کی طلب کے مطابق باقاعدگی سے منظم کیا جانا چاہیے تھا، لیکن ایسا نہیں ہوا۔

13 سے 27 ستمبر تک تقریباً ہر سرکاری بلیٹن سے ظاہر ہوتا ہے کہ سندھ تک اس کی ضرورت سے زیادہ پانی پہنچتا رہا۔ مشرقی دریاؤں سے بھی اس فرق کو پورا کرنے کے لیے کوئی نمایاں اضافی پانی دستیاب نہیں تھا۔ پنجند کے زیریں حصے میں صرف چند ہزار کیوسک پانی موجود تھا اور 26 اور 27 ستمبر کو یہ بہاؤ صفر تک پہنچ گیا تھا۔ اس لیے سندھ تک پہنچنے والا تمام اضافی پانی براہِ راست دریائے سندھ میں تربیلا اور چشمہ کے ذخائر سے خارج کیا گیا پانی تھا۔

منگلا ڈیم بھی 2009ء میں مقرر کی گئی اس کی توسیع شدہ سطح 1242 فٹ سے تقریباً 20 فٹ کم بھرا ہوا تھا۔ ویسے بھی نئی سطح مقرر ہونے کے بعد منگلا ہر سال لازماً اس سطح تک نہیں بھرتا۔ اس کے باوجود موجودہ ذخیرہ معمولی نہیں ہے۔ لیکن سوال یہ ہے کہ خریف کے آخری پندرہ دنوں کے دوران منگلا ڈیم سے پنجاب کی ضروریات سے زیادہ پانی کیوں خارج کیا گیا؟ اس پورے معاملے کا بھی تفصیلی جائزہ لینے کی ضرورت ہے۔ اس آپریشنل کمزوری کو اس طرح بھی سمجھا جا سکتا ہے کہ جب پانی کی طلب زیادہ تھی تو تربیلا سے اخراج تقریباً وہی رہا، اور جب طلب کم ہوئی تو بھی اخراج میں اسی حساب سے کمی نہیں کی گئی۔ اس سے یہ سوال پیدا ہوتا ہے کہ آیا ڈیموں کو روزانہ کی تکنیکی صورتحال اور صوبائی انڈنٹ کے بجائے کسی دوسری منطق کے تحت عمومی انداز میں چلانے کی کوشش کی گئی۔

یقینی طور پر یہ نہیں کہا جا سکتا، لیکن اس کی ایک ممکنہ انتظامی وجہ تربیلا کے پانچویں توسیعی منصوبے، یعنی ٹی۔5، کا تعمیراتی کام بھی ہو سکتی ہے۔ اس منصوبے کا بالائی اِن ٹیک ڈھانچہ صرف پانی کی کم سطح والے مہینوں، یعنی اکتوبر سے مئی کے دوران تعمیر کیا جا سکتا ہے، جب تربیلا جھیل کی سطح کوفر ڈیم سے نیچے آ جاتی ہے۔

کوفَر ڈیم ایک عارضی بند ہوتا ہے جو دریا یا پانی کے دیگر ذخائر میں اس مقصد کے لیے تعمیر کیا جاتا ہے کہ تعمیر یا مرمت کے مقام سے پانی نکال کر اسے خشک کیا جا سکے۔ گزشتہ سال نومبر کے اختتام تک تعمیراتی گڑھے کو مکمل طور پر خشک نہیں کیا جا سکا تھا۔ممکن ہے کہ تعمیراتی ضروریات کے باعث تربیلا جھیل کو تیزی سے خالی کرنے کا دباؤ موجود ہو، جیسا کہ گزشتہ سال بھی صورتحال رہی تھی۔ لیکن یہ بھی ممکن ہے کہ موجودہ صورتحال کا اس تعمیراتی منصوبے سے کوئی تعلق نہ ہو، کیونکہ ایسی کوئی باضابطہ ہدایت سامنے نہیں آئی جس سے اس مفروضے کی تصدیق ہو سکے۔

تاہم وجوہات کو ایک طرف رکھتے ہوئے سرکاری بلیٹن میں موجود اعداد و شمار کی حقیقت تبدیل نہیں ہوتی کہ دونوں صوبوں، سندھ اور پنجاب، کی پانی کی طلب اور ان کے حصے کے حصول کے بعد بھی ڈیموں سے ضرورت سے زیادہ پانی خارج کیا گیا۔ اس تمام صورتحال کے باوجود ربیع کے موسم کے لیے متوقع 20 سے 25 فیصد پانی کی قلت کو حوصلے اور بہتر انتظام کے ساتھ سنبھالا جا سکتا ہے۔ ایسا نہیں کہ صورتحال مکمل مایوسی یا بے بسی کا تقاضا کرتی ہے۔ اس میں کوئی شک نہیں کہ پانی کی جسمانی دستیابی میں کمی موجود ہے، لیکن بہتر انتظام کاری اور ادارہ جاتی منصوبہ بندی کے ذریعے اس صورتحال کا مکمل سمجھ بوجھ اور نتیجہ خیز انداز میں مقابلہ کیا جا سکتا ہے۔

اگر محکمہ آبپاشی اپنے داخلی نظام میں سخت اور باقاعدہ ریگولیشن نافذ کرے، نہروں اور شاخوں میں پانی کی تقسیم کی مؤثر نگرانی یقینی بنائے اور بالخصوص ٹیمپر شدہ یا ٹوٹے ہوئے ماڈیولز کے ساتھ ساتھ پانی چوری پر سخت کنٹرول قائم کرے تو ربیع میں پانی کی اس قلت کو منظم کیا جا سکتا ہے۔

اس قسم کی ادارہ جاتی چستی کے ذریعے پانی کم ہونے کے باوجود آخری سرے، یعنی ٹیل کے علاقوں تک بھی مناسب مقدار میں پانی پہنچانا ممکن ہوگا۔ اس سے آنے والے ربیع کے موسم اور گندم کی فصل پر پڑنے والے ممکنہ دباؤ اور نقصان کو کم سے کم سطح تک محدود کیا جا سکتا ہے۔

اس وقت جب ارسا کی فنی اور مشاورتی کمیٹیوں کے اجلاس جاری ہیں یا ہونے والے ہیں، ضرورت اس امر کی ہے کہ آنے والے موسم کے اعداد و شمار کو محض قسمت کا فیصلہ سمجھ کر پیش کرنے کے بجائے زمینی حقائق کی بنیاد پر پالیسی تشکیل دی جائے۔

روزانہ کے بلیٹن میں صوبوں کی جانب سے پانی کے حصول، ان کی طلب اور ذخیرے سے خارج ہونے والے پانی کے اعداد و شمار واضح طور پر موجود رہے ہیں۔ اب اگر ڈیموں سے پانی کے اخراج میں فنی ذمہ داری اور احتیاط اختیار کی جائے اور آبپاشی کے نیٹ ورک میں شفاف نظام کے ذریعے پانی کو محفوظ کیا جائے تو کسان، کاشت کار اور زراعت کسی بڑے دھچکے سے محفوظ رہ سکتے ہیں۔

پانی کی قلت ایک حقیقی مسئلہ ہے، لیکن محدود پانی کے بہتر انتظام سے اس کے اثرات کو کم کیا جا سکتا ہے۔ ضرورت اس بات کی ہے کہ پانی کے ہر اخراج کو صوبائی طلب، دستیاب ذخیرے اور آنے والے موسم کی ضرورت کے تناظر میں دیکھا جائے۔ اگر ڈیموں کے آپریشن میں فنی اصولوں کو ترجیح دی جائے، آبپاشی کے نظام میں شفافیت پیدا کی جائے اور پانی کے ضیاع و چوری کو روکا جائے تو موجودہ قلت کے باوجود ربیع کی فصلوں کو بڑے نقصان سے بچانے کے امکانات پیدا کیے جا سکتے ہیں۔

آخرکار پانی صرف دریاؤں اور ڈیموں میں موجود ایک قدرتی وسیلہ نہیں بلکہ ملک کی خوراک، زراعت، معیشت اور لاکھوں کسان خاندانوں کے مستقبل سے جڑا ہوا معاملہ ہے۔ اس لیے آنے والے ربیع کے موسم میں پانی کی ممکنہ قلت کو محض ایک قدرتی مجبوری سمجھ کر قبول کرنے کے بجائے اس کے انتظامی پہلوؤں کا بھی سنجیدگی سے جائزہ لینا ہوگا۔ محدود پانی کو دانش مندی، شفافیت اور فنی ذمہ داری کے ساتھ استعمال کرنا ہی موجودہ صورتحال میں سب سے اہم ضرورت ہے۔