سندھ میں توانائی اور موسمیاتی تبدیلی پر دو روزہ کانفرنس 3 نومبر سے ہوگی
سندھ میں توانائی کی پالیسی، صاف توانائی کے فروغ اور موسمیاتی تبدیلی کے اثرات سے نمٹنے کے لیے دو روزہ کانفرنس 3 اور 4 نومبر کو منعقد کی جائے گی۔ اس میں حکومتی نمائندے، ماہرین، ماحولیاتی کارکن، سیاست دان اور متاثرہ علاقوں کے شہری شرکت کریں گے۔
ڈان نیوز کے مطابق کانفرنس کا اعلان بدھ کو کراچی پریس کلب میں پریس کانفرنس کے دوران کیا گیا۔ کلائمیٹ ایکشن سینٹر کے ڈائریکٹر یاسر دریا نے کہا کہ سندھ ملک کے بڑے حصے کو بجلی فراہم کرتا ہے، لیکن صوبے کی اپنی جامع توانائی پالیسی موجود نہیں۔
کانفرنس میں توانائی تک رسائی، موسمیاتی انصاف، کوئلے پر انحصار کم کرنے، شمسی اور ہوا سے بجلی پیدا کرنے، صاف ٹرانسپورٹ اور موسمیاتی مالی معاونت پر 10 نشستیں ہوں گی۔ وزیراعلیٰ سندھ سید مراد علی شاہ کی دوسرے روز شرکت بھی متوقع ہے۔
منتظمین نے کہا کہ سندھ کے ایسے علاقوں کے شہریوں کو بھی بحث میں شامل کیا جائے گا جہاں بجلی دستیاب نہیں۔ ماہرین نے زور دیا کہ شمسی توانائی کے بڑھتے استعمال کے باوجود مقامی آبادی کو اس کے فوائد نہیں مل رہے، جبکہ دیہی خاندانوں کو سولر پینل اقساط پر مہنگے داموں خریدنا پڑتے ہیں۔
کانفرنس میں آئندہ موسمِ گرما کے لیے گرمی سے تحفظ کے منصوبے اور صاف توانائی تک منصفانہ رسائی پر بھی غور کیا جائے گا۔
