آصفہ ڈینٹل کالج کی خاتون پروفیسر کو ہراساں کیے جانے کا انکشاف

شمالی سندھ کی واحد میڈیکل یونیورسٹی شہید محترمہ بینظیر بھٹو میڈیکل یونیورسٹی (ایس ایم بی بی ایم یو) کے ڈینٹل کالج کی اسسٹنٹ پروفیسر نے سینیئر پروفیسر کے خلاف جنسی ہراسانی کی شکایت دائر کردی۔

میڈیکل یونیورسٹی کے واحد آصفہ ڈینٹل کالج لاڑکانہ کی اسسٹنٹ پروفیسر شمائلہ شیخ نے سینیئر پروفیسر اور ڈین فیکلٹی یوسف شاہ کے خلاف محتسب اعلیٰ سندھ کے اینٹی ہراسمنٹ سیل میں درخواست دائر کردی۔

سندھی ٹی وی چینل ٹائم نیوز کے مطابق شمائلہ شیخ نے اپنی درخواست میں ڈین فیکلٹی پر سنگین الزامات عائد کرتے ہوئے دعویٰ کیا ہے کہ انہیں تین سال سے ہراساں کیا جاتا رہا ہے۔

انہوں نے یوسف شاہ کے خلاف تفتیش کرنے کی درخواست کرتے ہوئے کہا کہ وہ تمام شواہد بھی کمیٹی کے سامنے پیش کریں گی، انہیں تین سال تک ہراساں کرکے ان کی ذہنی صحت داؤ پر لگائی گئی۔

دوسری جانب ڈین فیکلٹی نے خود پر لگائے گئے الزامات کی تردید کرتے ہوئے کہا ہے کہ خاتون مسلسل غیر حاضر رہی ہیں، اب ان کی ملازمت خطرے میں ہے، جس وجہ سے ان پر الزامات لگائے گئے۔

یوسف شاہ نے دعویٰ کیا کہ ان پر الزام لگانے والی خاتون کے پاس ان پر الزام لگانے کا ایک بھی ثبوت نہیں ہے۔