سندھ میں کاروباری آسانیوں کے لیے ضابطہ جاتی اصلاحات کا جائزہ، 150 خدمات ڈیجیٹل نظام سے منسلک
سندھ کے وزیراعلیٰ سید مراد علی شاہ اور وزیراعظم کی رابطہ کمیٹی برائے ضابطہ جاتی اصلاحات نے کاروبار اور سرمایہ کاری کے ماحول کو بہتر بنانے، سرکاری طریقہ کار آسان بنانے اور وفاقی و صوبائی اداروں کے درمیان رابطہ مضبوط کرنے کے لیے اصلاحاتی اقدامات کا جائزہ لیا ہے۔
بدھ کو ہونے والے اجلاس میں سندھ میں ڈیجیٹل کاروباری سہولتوں، مجوزہ سندھ آسان کاروبار ایکٹ، وفاقی اور صوبائی کاروباری پورٹلز کے انضمام اور عالمی بینک کے بزنس ریڈی (B-READY) فریم ورک کے تحت پاکستان کی کارکردگی بہتر بنانے پر غور کیا گیا۔
وزیراعلیٰ سندھ نے کہا کہ اصلاحات کے نتیجے میں کاروباری اداروں کو آسان طریقہ کار، تیز منظوریوں، کم تعمیلی اخراجات اور سرمایہ کاری کے لیے شفاف ماحول کی سہولت ملنی چاہیے۔
اجلاس کو بتایا گیا کہ سندھ بزنس ون اسٹاپ شاپ (SBOSS) کے ذریعے 19 صوبائی سرکاری اداروں کی تقریباً 150 کاروباری خدمات خودکار بنائی گئی ہیں۔ اس ڈیجیٹل پلیٹ فارم کے ذریعے اب تک 16 ہزار 500 سے زائد الیکٹرانک اجازت نامے جاری کیے جاچکے ہیں، جبکہ 800 سے زائد سرکاری اہلکاروں کو تربیت دی گئی ہے۔
اجلاس میں ماہی گیری، آبی زراعت، ڈیری اور مشروبات کے شعبوں میں 58 اصلاحات کا بھی جائزہ لیا گیا۔ ان اقدامات سے متعلقہ شعبوں میں منظوریوں کے عمل کے دوران مجموعی طور پر سیکڑوں دن کی بچت متوقع ہے۔
وزیراعلیٰ سندھ نے متعلقہ محکموں کو اصلاحات پر عمل درآمد، باقاعدہ نگرانی اور ذمہ داریوں کے واضح تعین کی ہدایت کی۔ وزیراعظم کے مشیر ہارون اختر خان نے بھی وفاقی اور صوبائی حکومتوں کے درمیان مؤثر تعاون کی اہمیت پر زور دیا۔
