پہلی بار سندھ میں 26 گھنٹے کی عمر کے بچے کے دل کی کامیاب سرجری

سندھ کے ماہرین صحت نے اہم کارنامہ سر انجام دیتے ہوئے پہلی بار 26 گھنٹے کی عمر کے بچے کے دل کا کامیاب آپریشن سر انجام دیا ہے۔

سندھ انسٹیٹیوٹ آف چائلڈ ہیلتھ (ایس آئی سی ایچ)ضلع کورنگی کے کارڈیالوجسٹس نے پہلی مرتبہ ایک روز کے نومولود بچے کے دل کی کامیاب سرجری کی۔

ڈاکٹرز نے 26 گھنٹے کی عمر کے بچے کے دل کی الٹی شریانوں کی درست سرجری کی جو اپنی نوعیت کا منفرد آپریشن تھا۔

نگران وزیر صحت سندھ ڈاکٹر سعد خالد نیاز کی کامیاب سرجری کرنے پر ڈاکٹر ارجمند اور ان کی ٹیم کو شاباشی دی اور انہیں زبردست خراج تحسین پیش کیا۔

ڈاکٹر سعد خالد نیاز کا کہنا تھا کہ سندھ کے شعبہ صحت میں ترقی کے لیے ڈاکٹر ارجمند اور ان کی ٹیم جیسے لوگوں کی ضرورت ہے۔

کم سن بچے کا کامیاب آپریشن کرنے پر عوام کی جانب سے بھی ڈاکٹرز کو سراہا جا رہا ہے۔