وفاق نے سندھ حکومت سے نجی کمپنی کے لیے ٹھٹھہ میں ایک ہزار ایکڑ زمین مانگ لی
وفاقی حکومت نے نجی ادارے پاک کار زون کے لیے سندھ حکومت سے ضلع ٹھٹھہ میں پرائیویٹ ایکسپورٹ پروسیسنگ زون کے لیے ایک ہزار ایکڑ زمین مانگ لی۔
وفاقی وزارت صنعت کے اعلیٰ سطح کے اجلاس میں بتایا گیا کہ میسرز پاکستان کار اینڈ مشینری زونز پرائیوٹ لمیٹڈ (پاکامز)کو پرائیوٹ ایکسپورٹ پروسیسنگ زون بنانے کے لیے ضلع ٹھٹھہ میں زمین درکار ہے۔
اجلاس میں وفاقی وزارت میری ٹائم افیئرز کے نمائندے، سیکریٹری لینڈ یوٹیلائیزیشن بورڈ آف ریونیو سندھ، پورٹ قاسم کے نمائندے، اور محکمہ سرمایہ کاری سندھ کے نمائندے نے شرکت کی۔
سیکریٹری لینڈ یوٹیلائیزیشن نے اجلاس کو بتایا کہ ضلع ٹھٹھہ میں قومی شاہراہ سے 6 کلومیٹر دور زمین موجود ہے جبکہ زمین کو کارآمد بنانے کے لیے برانچ روڈ پر کارپٹ کرنے کی ضرورت ہے۔
چیف ایگزیکٹو نے وضاحت مانگی کہ ابھی تک یہ طے نہیں کیا گیا کہ ان 6 کلومیٹر میں ترقیاتی کام حکومت سندھ کرائے گی یا پاکامز کرائے گی.
لینڈ یوٹیلائیزیشن کے نمائندے نے یقین دہانی کرائی کہ حکومت سندھ ان 6 کلومیٹر کے علاقے میں ترقیاتی کام کرائے گی تاکہ پاکامز کو سہولت فراہم کی جاسکے۔
سندھ حکومت نے اس سلسلے میں پاکامز سے پروجیکٹ فزیبلٹی رپورٹ ، فنانشل کلوز آف دی پروجیکٹ یا اخراجات کے ذرائع، ماسٹر پلان، ڈیزائن اینڈ لے آؤٹ، جیوٹیکنیکل رپورٹ اینڈ ٹوپوگرافیکل سروے اور ماحولیات پر پڑنے والے اثرات کی تجزیاتی رپورٹ مانگ لی ہے، مطلوبہ دستاویزات مل جانے کے بعد کیس کمیٹی کے حوالے کیا جائے گا۔
