سندھ کے تین ہزار اہلکار پولیس کے اعلیٰ افسران کی سیکیورٹی اور خدمت پر مامور

سندھ میں پولیس کے تین ہزار کے قریب اہلکار افسران اور ریٹائرڈ افسران کی سیکیورٹی اور خدمت پر مامور ہیں۔

سندھ ٹرانسپیرنسی اینڈ رائٹ ٹو انفارمیشن ایکٹ 2016 کے تحت سندھ پولیس کی جانب سے فراہم کردہ معلومات کے مطابق تین ہزار کے قریب اہلکار افسران کی سیکیورٹی و خدمت پر مامور ہیں۔

پولیس کی جانب سے فراہم کردہ جوابات کے مطابق کراچی میں سیکورٹی ٹو کے 1437 پولیس اہلکار موجودہ اور ریٹائرڈ پولیس افسران کے ساتھ ڈیوٹی پر تعینات ہیں جن میں 1064 اہلکار موجودہ افسران اور 373 ریٹائرڈ پولیس افسران کے ساتھ تعینات ہیں۔

ان افسران میں آئی جی سندھ سے انسپکٹر لیول کے افسران شامل ہیں۔

ریکارڈ کے مطابق سیکورٹی ٹو کے 71 پولیس اہلکار آئی جی سندھ،102 اہلکار ایڈیشنل آئی جیز، 334 اہلکار ڈی آئی جیز، 361 اہلکار ایس ایس پیز، 136 اہلکار ایس پیز ،44 اہلکار ڈی ایس پیز اور 16 اہلکار انسپکٹرز کے ساتھ تعینات ہیں۔

ریکارڈ کے مطابق سندھ کے ریٹائرڈ آئی جیز کے ساتھ 103، ریٹائرڈ ایڈیشنل آئی جیز کے ساتھ 127، ریٹائرڈ ڈی آئی جیز کے ساتھ 39، ریٹائرڈ ایس ایس پیز کے ساتھ 20، ریٹائرڈ ایس پیز کے ساتھ 80 اور ریٹائرڈ ڈی ایس پیز کے ساتھ 4 پولیس اہلکار ڈیوٹی پر تعینات ہیں۔

اسپیشل سیکورٹی یونٹ ( ایس ایس یو ) 105 پولیس اہلکار موجودہ اور ریٹائرڈ پولیس افسران کے ساتھ ڈیوٹی پر مامور ہیں۔