شدید دھند کے باعث ٹھٹھہ کے قریب متعدد گاڑیاں آپس میں ٹکرا گئیں، 5 افراد جاں بحق

ٹھٹھہ کے علاقے گھارو کے قریب شدید دھند کی وجہ سے 6 گاڑیوں کے آپس میں ٹکرانے کے باعث کم سے کم پانچ افراد جاں بحق جب کہ 12 سے زائد زخمی ہوگئے۔

ریسکیو ذرائع کے مطابق گاڑیوں کے ٹکرانے کا افسوسناک حادثہ قومی شاہراہ پر گھارو کے قریب صبح کے وقت شدید دھند کے باعث پیش آیا۔

واقعے میں 2 ٹرک اور کاروں سمیت 6 گاڑیاں آپس میں ٹکرا گئیں، حادثے کے باعث 3 افراد موقع پر ہی دم توڑ گئے، 14 زخمیوں کو مقامی افراد نےاپنی مدد آپ کے تحت مختلف اسپتالوں میں منتقل کیا گیا، جہاں مزید 2 زخمی دم توڑ گئے۔

مقامی ریسکیو اہلکاروں نے بتایا کہ مزید 4 شدید زخمیوں کی تشویشناک ہے، جنہیں کراچی منتقل کیا گیا۔

واقعے میں پانچ افراد کے جاں بحق ہونے اور 12 کے زخمی ہونے پر کئی سیاسی و سماجی رہنماؤں نے اظہار افسوس بھی کیا۔