سندھ پولیس کی 25 لیڈی اہلکاروں کو موٹر سائیکلیں فراہم

کراچی ڈویژن سے تعلق رکھنے والی سندھ پولیس کی 25 لیڈی اہلکاروں کو ٹرانسپورٹ کی سہولیات فراہم کرنے کے لیے موٹر سائیکلیں فراہم کردی گئیں۔

ایڈیشنل انسپکٹر جنرل ( اے آئی جی) کراچی جاوید عالم اوڈھو کی ہدایت پر اسسٹنٹ ڈپٹی انسپکٹر جنرل (اے ڈی آئی جی) اسٹیبلشمنٹ محمد ارشد صدیقی نے دیگر افسران کے ہمراہ کراچی پولیس آفس (کے پی او) میں لیڈیز پولیس اہلکاروں کو 25 نئی موٹر سائیکلیں فراہم کیں۔

اس منصوبے کامقصد پولیس کے گشت اور رسپانس ٹائم کو بہتر بنانے اور ڈرائیونگ لائسنس ہولڈر لیڈیز پولیس کو ٹرانسپورٹ کی سہولت کی فراہمی کو یقینی بنانا ہے۔

لیڈیز پولیس اہلکاروں نے موٹر سائیکلیں وصول کرنے کے بعد اپنے عزم کا اظہار کرتے ہوئے کہا کہ وہ عوام کی خدمت اور حفاظت کے لیے اپنے فرائض مزید لگن اور ذمہ داری کے ساتھ ادا کریں گی۔