سندھ حکومت کا سرکاری افسران کی گاڑیاں الیکٹرک گاڑیوں میں تبدیل کرنے کا فیصلہ

حکومت سندھ نے سرکاری افسران کی ناکارہ گاڑیاں ایک ماہ کے اندر نیلام کرکے سرکاری اعلیٰ ملازمین کے لیے الیکٹرک گاڑیاں خریدنے کا فیصلہ کرلیا۔

سینئر صوبائی وزیر شرجیل انعام میمن کی زیر صدارت سندھ کابینہ کی ذیلی کمیٹی برائے کفایت شعاری کا اجلاس ہوا، جس میں صوبائی وزرا سعید غنی، ضیا الحسن لنجار، علی حسن زرداری اور مختلف محکموں کے سیکرٹریز شریک ہوئے۔

اجلاس میں کمیٹی ممبران کی جانب سے سرکاری گاڑیوں کی الاٹمنٹ کو ریگولیٹ کرنے کے لیے واضح گائیڈ لائنز پر عمل کرنے کی ہدایات کی گئیں۔

اجلاس میں مختلف محکموں کے سیکرٹریز نے سرکاری گاڑیوں سے متعلق 10 سالہ ریکارڈ پیش کیا۔

شرجیل انعام میمن نے اجلاس میں گفتگو کرتے ہوئے کہا کہ پرانی گاڑیوں کی نیلامی کا عمل ایک ماہ کے اندر مکمل ہونا چاہیے تاکہ وسائل مزید ضائع نہ ہوں اور نئی گاڑیوں کی ضرورت کو پورا کیا جا سکے۔

ان کا کہنا تھا کہ ای وی گاڑیاں خریدنے سے حکومت کو فائدہ ہوگا، پیٹرول کی بچت ہوگی، ایسی گاڑیوں کی بعد میں نیلامی میں بھی آسانی ہوگی۔