دریائے سندھ سے کینال نکالنے کے خلاف سندھ بھر میں 14 مارچ کو احتجاجی دھرنے دینے کا اعلان

دریائے سندھ سے کینالز نکالنے پر گرینڈ ڈیموکریٹک الائنس (جی ڈی اے) سمیت مختلف تنظیموں نے 14 مارچ کو سندھ بھر میں احتجاج کا اعلان کر دیا۔

جی ڈی اے اور کینال مخالف تنظیموں کے رہنماؤں نے کراچی میں پریس کلب پر پریس کانفرنس کرتے ہوئے کہا کہ اگر دریائے سندھ پر کینالز بن گئیں تو مستقبل میں خطرنا ک نتائج ہوں گے۔

رہنماؤں کا کہنا تھا کہ گریٹر تھل کینال، جلال پور کینال، چولستان کینال سے پنجاب کی لاکھوں ایکڑ اراضی سیراب ہوگی، سندھ کی 35 لاکھ ایکڑ اراضی غیر آباد ہوجائے گی،ہماری زراعت تباہ ہوجائے گی۔

انہوں نے کہا کہ کینالز منصوبے پر پیپلزپارٹی کا رویہ منافقانہ ہے، اگر پیپلز پارٹی کینالز پر ن لیگ کے ساتھ نہیں تو حکومت سے الگ ہوجائے۔

یاد رہے کہ دریائے سندھ سے 6 نہریں نکالنے کے سندھ دشمن منصوبے کے خلاف صوبے بھر میں گزشتہ چند ماہ سے احتجاج جاری ہیں۔

کراچی، حیدر آباد ، بدین ، نوابشاہ، نوشہروفیروز، لاڑکانہ، سکھر، میرپورخاص، ٹھٹہ، بدین،مٹھی، دادو، شکار پور، کشمور اور میہڑ سمیت دیگر شہروں میں آئے روز احتجاجی ریلیاں نکالی جا رہی ہیں۔