معروف اداکار میر محمد لاکھو انتقال کر گئے

سندھی اور اردو ڈراموں کے نامور سینیئر اداکار میر محمد لاکھو 75 برس کی عمر میں عارضہ قلب کے باعث انتقال کر گئے۔

میر محمد لاکھو گزشتہ چند سال سے علیل تھے، انہیں عارضہ قلب سمیت سانس لینے میں تکلیف جیسی طبی پیچیدگیاں بھی تھیں۔
میر محمد لاکھو نے پاکستان ٹیلی وژن (پی ٹی وی) سینٹر کراچی سے سندھی ڈراموں سے اداکاری کا آغاز کیا، انہوں نے زیادہ تر معاون کردار ادا کیے۔

میر محمد لاکھو کو ورسٹائل انداز میں اداکاری کرنے کی وجہ سے شہرت حاصل تھی، انہوں نے سندھی کے علاوہ اردو اور بلوچی زبان کے ڈراموں میں بھی اداکاری کی جب کہ سندھی فلموں میں بھی انہوں نے اداکاری کے جوہر دکھائے۔

میر محمد لاکھو نے 1980 کے بعد کیریئر کا آغاز کیا، انہوں نے ریڈیو پاکستان کے ڈراموں میں بھی کردار ادا کیے جب کہ انہوں نے پاکستان کے علاوہ متعدد بیرون ممالک جاکر اسٹیج پرفارمنس بھی دی۔

میر محمد لاکھو نے اگرچہ پی ٹی وی سے کیریئر کا آغاز کیا، تاہم انہیں زیادہ تر شہرت نجی ٹی وی چینلز سامنے آنے کے بعد ملی، جہاں انہوں نے 2002 کے بعد روایتی سندھی وڈیروں کے خصوصی کارندوں یعنی کمداروں کے کردار ادا کیے۔

میر محمد لاکھو کو ظالم وڈیرے کے ظاہم کمدار کے کردار ادا کرنے سے زیادہ شہرت ملی اور انہیں ڈراموں میں خواتین و بچوں کو تڑپانے، ان پر ظلم کرتے دیکھا جاتا اور ان کے ان ہی کرداروں کی وجہ سے انہیں شہرت بھی ملی۔

زائد العمری کی وجہ سے میر محمد لاکھو نے زندگی کے آخری ایام میں اداکاری کرنا کم کردی تھی اور کورونا کی لہر کے بعد ان میں بیماریوں کی شدت بڑھ گئی اور 2020 میں انہیں عارضہ قلب کے باعث نجی اسپتال میں داخل بھی کرایا گیا تھا۔

عارضہ قلب کے بعد گزشتہ دو سال سے میر محمد لاکھوں نے اداکاری کم کردی تھی، تاہم وہ مختلف تقریبات میں دکھائی دیتے رہے تھے۔
میر محمد لاکھو 15 جنوری کو صوبائی دارالحکومت کراچی کے شانتی نگر کے علاقے میں اپنی رہائش گاہ پر خالق حقیقی سے جا ملے، قریبی ذرائع کے مطابق انہیں دل کا دورہ پڑا تھا۔

میر محمد لاکھو 14 اور 15 جنوری کی درمیان شب دیر گئے انتقال کر گئے تھے اور ان کا جسد خاکی آبائی گائوں تحصیل سکرنڈ ، ضلع بینظیر آباد(نوابشاہ) لے جایا گیا۔

میر محمد لاکھو کی تدفین ان کے آبائی گائوں پھلو لاکھو میں سید ورل شاہ کے قبرستان میں تدفین کی گئی اور ان کی نماز جنازہ میں سیکڑوں افراد نے شرکت کی۔

میر محمد لاکھو کے انتقال پر سندھی شوبز سمیت سیاسی و سماجی افراد نے گہرے افسوس کا اظہار کیا جب کہ پاکستان پیپلز پارٹی (پی پی پی) کے چیئرمین بلاول بھٹو زرداری نے بھی ایک بیان میں ان کے انتقال پر تعزیت کا اظہار کیا۔