سندھ میں انسانی حقوق کی خلاف ورزیاں بڑھ گئیں، پولیس خلاف ورزیوں میں بازی لے گئی

سندھ میں انسانی حقوق کی خلاف ورزیاں بڑھ گئیں، انسانی حقوق کی خلاف ورزیوں میں لوگوں کے تحفظ کو یقینی بنانے والا ادارہ پولیس سر فہرست رہا۔

محکمہ انسانی حقوق سندھ نے 5 ماہ کی کارکردگی رپورٹ جاری کردی، جس میں بتایا گیا ہے کہ صوبے میں 5 ماہ کے دوران 1271 انسانی حقوق کی خلاف ورزیاں ہوئیں، جن میں حبس بے جا، ہراساں، مبینہ زیادتی، خودکشی،بدفعلی، قتل، اغوابرائےتاوان شامل ہیں۔

ڈپٹی ڈائریکٹر شاہد ابڑو کے مطابق سندھ میں سب سے زیادہ 786 شکایات پولیس کے خلاف رہیں۔ رپورٹ میں مزید بتایا گیا ہے کہ پولیس کے بعد دوسرے نمبر پر محکمہ ریونیو، تیسرے نمبر پر تعلیم اور محکمہ محنت رہے۔

رپورٹ کے مطابق سندھ بھر میں مبینہ زیادتی کے 43، خودکشی 94 ،اغوا برائے تاوان کے 157 اور قتل کے 373 کیسز رپورٹ ہوئے۔ پولیس کے خلاف کی گئی شکایات پر اجلاس بلانے اور ایکشن کے لیے آئی جی سندھ کو آگاہ کردیا۔