لاڑکانہ سے عراق جانے والی زائرین کی بس کو ایران میں حادثہ، 35 افراد جاں بحق
لاڑکانہ سے عراق کے لیے روانہ ہونے والی بس کو ایرانی شہر میں حادثہ پیش آنے سے کم سے کم 35 زائرین موقع پر جاں بحق ہوگیے، جب کہ 18 کی حالت تشویش ناک بتائی جا رہی ہے۔
ایرانی میڈیا کے مطابق لاڑکانہ کے زائرین کی بس ایرانی شہر دہشیر تفتان چیک پوائنٹ کے سامنے الٹ گئی جس کے بعد بس کو آگ لگ گئی۔
ایرانی میڈیا کا بتانا ہےکہ زائرین کی بس کو حادثہ رات 9 بج کر 54 منٹ پر پیش آیا، بس میں 53 زائرین سوار تھے، حادثے میں 35 افراد جاں بحق اور 18 زخمی ہوگئے جن میں سے بعض کی حالت تشویشناک ہے۔
ایرانی میڈیا کے مطابق حادثے کی اطلاع ملتے ہی امدادی ٹیمیں جائے حادثہ پر پہنچ گئیں اور زخمیوں و لاشوں کو بس سے نکالا جب کہ حادثے کے بعد اسپتالوں میں ایمرجنسی نافذ کردی گئی۔
دوسری جانب لاڑکانہ میں موجود مولانا قمر عباس نقوی کا دعویٰ ہے کہ حادثے میں 35 افراد جاں بحق اور 15 زخمی ہوئے۔
انہوں نے بتایا کہ بس لاڑکانہ سے روانہ ہوئی تھی جس میں 14 خواتین سمیت 50 سے زائد افراد سوار تھے، ، 10 افراد خیرپور اور 6 افراد کا تعلق کشمور سے تھا۔
ایران میں موجود قافلے کے سر براہ سید اطہر شمسی نے حادثے کی تفصیلات بتاتے ہوئے کہا کہ قافلے میں دو بسیں شامل تھیں، ایک بس میں وہ خود بھی سوار تھے، زائرین دو بسوں میں سوار تھے، پاسپورٹ اور کاغذات کے مسائل کی وجہ سے ان کی بس پیچھے رہ گئی، آگے جانے والی بس حادثے کا شکار ہوگئی۔
