سندھ میں میٹرک اور انٹر میں پوزیشن سسٹم ختم، گریڈنگ پالیسی متعارف

سندھ حکومت نے صوبے میں میٹرک اور انٹر کی سطح پر نئی گریڈنگ پالیسی کا نوٹی فکیشن جاری کر دیا، جس کے تحت طلبہ کو امتحانات میں نمبروں اور پوزیشنز کے بجائے گریڈز ملیں گے۔

ملک بھر میں سندھ پہلا صوبہ بن گیا ہے جس نے گریڈنگ پالیسی کی منظوری دی ہے ، سندھ میں نئی گریڈنگ پالیسی کا اطلاق 2025ء سے ہوگا۔

چئیرمین آئی بی سی سی ڈاکٹر غلام علی ملاح کا کہنا ہے کہ نئی گریڈنگ پالیسی کے فارمولے کے مطابق پہلی، دوسری اور تیسری پوزیشنز ختم کر دی جائیں گی، گریڈنگ پالیسی کے فارمولا کے مطابق 95 یا زائد نمبرز کو اے ، غیر معمولی 90 نمبر کو شاندار A دیا جائے گا،اسی طرح 85 نمبر کو بہترین A دیا جائے گا۔

اس طرح 80 نمبر کو بہت اچھا B دیا جائے گا، 75 کو B گریڈ دیا جائے گا، 70 کو مناسب B دیا جائے، 60 کو اوسط سے اوپر C دیا جائے گا۔

نئی گریڈنگ پالیسی کے فارمولے کے مطابق آئندہ سال سے میٹرک اور انٹر کے پاسنگ مارکس 33 سے 40 کر دئیے جائیں گے، 40 سے کم نمبر والوں کو غیر تسلی بخش F گریڈ دیا جائے گا۔