سندھ پولیس کا سال 2024 میں کچے کے علاقوں میں 559 مقابلوں میں 74 ڈاکو ہلاک کرنے کا دعویٰ

سندھ پولیس نے صوبے کے کچے کے علاقوں میں سال 2024 میں مجموعی طور 559 پولیس مقابلوں میں 73 ڈاکو ہلاک کرنے کا دعویٰ کیا ہے۔

سندھ پولیس کی جانب سے سال کے اختتام پر جاری کیے گئے اعداد و شمار کے مطابق کچے کے علاقوں میں ہونے والے مقابلوں میں 19پولیس اہلکار بھی شہید ہوئے جبکہ 618 افراد کو ہنی ٹریپ سے بچایا گیا۔

سندھ پولیس کی رپورٹ کے مطابق سال 2024 میں کچے کا ایریا جن میں ضلع سکھر، گھوٹکی، کشمور اور شکارپور کے علاقے شامل ہیں میں پولیس نے 559 مقابلوں میں 73 ڈاکوؤں کو ہلاک، 120 کو زخمی جبکہ 378 کو گرفتار کیا۔

سکھر میں 39، گھوٹکی میں 58، کشمور میں 215 اور شکارپور میں 247 پولیس مقابلے ہوئے۔

سکھر میں 6، گھوٹکی میں 10، کشمور میں 24اور شکارپور کے کچہ کے علاقے میں پولیس کے ساتھ مقابلوں میں 33 ڈاکو ہلاک ہوئے۔

مقابلوں کے دوران 19 پولیس اہلکار شہید اور 31 زخمی ہوئے۔ گھوٹکی میں 7، کشمور میں 7، شکارپور میں 4 اور سکھر میں ایک پولیس اہلکار شہید ہوا۔

پولیس کے مطابق رواں برس 618افراد کو ہنی ٹریپ سے بچایا گیا۔

شکارپور میں 243، کشمور میں 337، گھوٹکی میں 32 اور سکھر میں 6 افراد کو ہنی ٹریپ سے بچایا گیا۔

پولیس نے کچے کے علاقوں سے 436 مختلف اقسام کے ہتھیار بھی برآمد کیے۔