سندھ حکومت میں 8 ترجمان، 12 معاون خصوصی تعینات، کابینہ کی تعداد 54 ہوگئی

وزیر اعلیٰ مراد علی شاہ نے سندھ کابینہ میں بڑی توسیع کرتے ہوئے مزید 8 ترجمان اور 12 معاون خصوصی مقرر کردیے، جس کے بعد کابینہ ارکان کی تعداد 54 تک جا پہنچی۔

سندھ حکومت میں پہلے ہی 18 صوبائی وزیر، 10 معاونین خصوصی اور 6 ترجمان خدمات سر انجام دے رہے تھے، پہلے کابینہ ارکان کی تعداد 34 تھی، جس میں اب 20 ارکان کا اضافہ کردیا گیا، جس کے بعد کابینہ کی تعداد بڑھ کر 54 ہوگئی۔

وزیر اعلیٰ سندھ مراد علی شاہ نے مزید 8 ترجمان اور 12 معاون خصوصی کی تقرریوں کی منظوری دے دی، جس کا نوٹی فکیشن بھی جاری کردیا گیا۔

جن کو سندھ حکومت کے ترجمان مقرر کیا گیا ہے، ان میں نادر نبیل گبول، سکھدیوا سرداس ہیمنانی، بلند خان
جونیجو، سمیتا افضل، سیدہ تحسین عابدی، ہیر سوہو، سیدہ اقربا فاطمہ اور مصطفیٰ عبداللہ بلوچ شامل ہیں۔

اس اضافے کے ساتھ سندھ حکومت کے ترجمانوں کی تعداد بڑھ کر 18 ہو گئی۔

اس کے علاوہ سندھ حکومت نے 12 معاونین خصوصی بھی مقرر کر دیے ہیں۔

نوٹفیکیشن کے مطابق رضا ہارون، پیر سید افضال، لیاقت علی اسکانی، تنزیلہ ام حبیبہ، امیر حمزہ رئیس، خیر محمد شیخ، امان اللہ محسود، کلثوم چانڈیو، محمد علی راشد، محمد علی بھٹو، حسین اسلم اور ویرجی کولہی کو معاونین خصوصی مقرر کیا گیا۔

اس سے قبل معاونین خصوصی کی تعداد 10 تھی جو اب بڑھ کر 22 ہو گئی جب کہ سندھ کابینہ ارکان کی مجموعی تعداد 34 سے بڑھ کر 54 تک جا پہنچی۔