سندھ میں اشیا کی قیمتوں پر نظر رکھنے کے لیے الگ تھانے بنانے کا فیصلہ

سندھ حکومت نے بے جا مہنگائی پر قابو پانے اور منافع خوروں پر نظر رکھنے اور ان کے خلاف کارروائیوں کے لیے الگ تھانے قائم کرنے کا فیصلہ کرلیا۔
نئے تھانوں میں محکمہ بیورو آف سپلائی اور پولیس کا علمہ شامل ہوگا۔
اس ضمن میں وزیر سندھ کے معاونین وقار مہدی اور عثمان ہنگورو کی زیر صدارت اجلاس ہوا، جس میں صوبے کے تمام اضلاع میں منافع خوروں کے خلاف کارروائی کا فیصلہ کیا گیا۔
اجلاس میں وقار مہدی نے کہا کہ منافع خوروں کے خلاف کارروائی کیلئے تھانوں کے قیام کا فیصلہ کیا ہے، تھانوں میں محکمہ بیورو آف سپلائی اور پولیس کا علمہ شامل ہوگا۔
انہوں نے بتایا کہ اشیائے خورونوش کی قیمتوں میں استحکام لانا اور ذخیرہ اندوزی روکنا چاہتے ہیں، اس کے علاوہ تمام گوداموں کو رمضان سے پہلے رجسٹرڈ کرنے کا فیصلہ بھی کیا گیا ہے۔
ان کے مطابق بچت بازاروں میں خصوصی اسٹال اور پھلوں کی مقررہ قیمتوں کو یقینی بنایا جائے جب کہ سبزی منڈیوں کے کولڈ اسٹوریج رجسٹرڈ اور ان کی نگرانی کی جائے گی۔
وقار مہدی کا کہنا تھاکہ نئے تھانے سندھ میں منافع خوروں کے خلاف کارروائی کرنے کے مجاز ہوں گے، صوبے بھر کی مارکیٹوں کی نگرانی کے لیے خصوصی ڈیوٹیاں لگانے کی ہدایت کردی۔