سندھ حکومت نے خیبرپختونخوا سیلاب متاثرین کے لیے امدادی سامان بھیج دیا

سندھ حکومت کی جانب سے خیبر پختونخوا میں سیلاب سے متاثرہ خاندانوں کیلئے راشن بیگ اور دیگر ضروری اشیائے خوردونوش سے لدے10ٹرک روانہ کردیئے گئے۔
وزیراعلیٰ سندھ سید مراد علی شاہ نے خیبر پختونخوا میں سیلاب سے متاثرہ خاندانوں کے لیے واٹر فلٹریشن پلانٹ ، راشن بیگ اور دیگر ضروری اشیائے خوردونوش سے لدے 10 ٹرک روانہ کردیئے۔
مراد علی شاہ نے حالیہ سیلاب سے متاثرہ خیبرپختونخوا اور گلگت بلتستان کے لوگوں کے ساتھ یکجہتی کا اظہار کرتے ہوئے سندھ حکومت کی جانب سے فوری امدادی اقدامات کا اعلان کیا۔
وزیراعلیٰ نے خیبرپختونخوا حکومت سے رابطے کے بعد چیف سیکرٹری آصف حیدر شاہ کو ان کی ضروریات کے مطابق واٹر فلٹریشن پلانٹ کے پی بھیجنے کی ہدایت کی اور سیلاب سے متاثرہ خاندانوں کے لیے راشن بیگ اور دیگر ضروری اشیائے خوردونوش سے لدے 10 ٹرک فوری روانہ کرنے کا حکم دیا۔
پی ڈی ایم اے کے مطابق خیبر پختونخوا میں بارشوں کے بعد آنے والے سیلاب سے 17 اگست تک اموات کی تعداد 323 تک جا پہنچی تھیں، جن میں سے 217 کا تعلق بونیر سے ہے۔
حکام کے مطابق 134 لاپتہ افراد کی تلاش جاری ہے، وزیر اعلیٰ خیبر پختونخوا علی امین گنڈاپور نے کہا ہے کہ سیلاب سے تباہ ہونے والے گھروں کو دوبارہ تعمیر کیا جائے گا، انہوں نے ضلع کے لیے ڈیڑھ ارب روپے امداد کا اعلان کیا ہے۔