سندھ بھر میں تمام اقسام کی عمارتوں کے نقشوں کی منظوری پر پابندی عائد

سندھ کے نگراں وزیر بلدیات مبین جمانی کی ہدایت پر محکمہ بلدیات نے سندھ بھر میں تمام اقسام کی عمارتوں کے نقشوں کی منظوری پر پابندی لگادی، جس کا نوٹیفکیشن جاری کردیا گیا۔

نوٹیفکیشن کے مطابق سندھ میں عمارتوں، گھروں اور کمرشل پلازوں کے نقشوں کی منظوری پر تا حکم ثانی پابندی عائد کردی گئی۔

پابندی کا اطلاق سندھ بلڈنگ کنٹرول اتھارٹی (ایس بی سی اے) اور تمام ڈویلپمنٹ اتھارٹیز پر لاگو ہوگا۔

نوٹیفکیشن میں کہا گیاہے کہ کراچی ڈیولپمنٹ اتھارٹی، ملیر ڈیولپمنٹ اتھارٹی، لیاری ڈیولپمنٹ اتھارٹی، حیدرآباد ڈیولپمنٹ اتھارٹی، سہون ڈیولپمنٹ اتھارٹی ، محکمہ ماسٹر پلان اور ٹاؤن پلاننگ ڈپارٹمنٹ اور سندھ بلڈنگ کنٹرول اتھارٹی کے سربراہان کو پابند کیا گیا ہے کہ وہ حکمنامے پر عمل کریں۔

اس کے علاوہ تمام قسم کے بلڈنگ پلان اور لے آؤٹ پلان پر بھی پابندی عائد کردی گئی۔