لاڑکانہ میں غباروں کے ذریعے گیس چرا کر بجلی بنانے کی انوکھی واردات

لاڑکانہ میں گیس چوری کا انوکھا طریقہ بے نقاب ہوا ہے، جہاں گیس کو پلاسٹک کے غباروں میں بھر کر غیر قانونی طور پر بجلی پیدا کی جا رہی تھی۔

تفصیلات کے مطابق سوئی سدرن گیس کمپنی (SSGC) کے تھیفٹ سیکشن نے ڈسٹری بیوشن شکارپور کے ہمراہ شکارپور کے صدیق ماڑی سرکلر روڈ پر چھاپا مار کارروائی کی۔

کارروائی کے دوران دو افراد، مہتاب علی سومرو اور اعجاز شاہ، رنگے ہاتھوں گرفتار ہوئے۔

ملزمان سروس والو کے نیچے رائزر پیس سے براہِ راست گیس حاصل کر کے 15 کلو واٹ کا جنریٹر چلا رہے تھے، جس کے ذریعے دکانوں اور گھروں کو کمرشل بنیادوں پر غیر قانونی بجلی فراہم کی جا رہی تھی۔

ایس ایس جی سی کے مطابق ملزمان نے گیس کو دو پلاسٹک کے غباروں میں ذخیرہ کیا ہوا تھا، جو رات کے وقت جنریٹر کو سپلائی کی جاتی تھی۔

کمپنی کا کہنا ہے کہ کُل چوری شدہ گیس کا کنیکٹڈ لوڈ 188 کیوبک فٹ فی گھنٹہ ریکارڈ کیا گیا۔

ملزمان کے خلاف ایف آئی آر درج کر لی گئی ہے جبکہ ان سے واجب الادا رقم بھی وصول کی جائے گی۔