سندھ پبلک سروس کمیشن کی میونسپل افسران کے عہدے فروخت کرنے کے الزامات کی تردید
سندھ پبلک سروس کمیشن (ایس پی ایس سی) نے حال ہی میں محکمہ بلدیات کے گریڈ 17 کے میونسپل افسران کے نتائج پر خود پر لگنے والے الزامات پر وضاحت کرتے ہوئے کہا ہے کہ کمیشن پر شواہد کے بغیر من گھڑت الزامات لگائے جا رہے ہیں تاہم کمیشن ایسے الزامات والوں کی دھمکیوں میں نہیں آئے گا اور تمام الزامات کی سختی سے تردید کرتا ہے۔
ایس پی ایس سی نے حال ہی میں میونسپل افسران کے نتائج کا اعلان کرتے ہوئے 419 امیدواروں کو کامیاب قرار دیا تھا جب کہ کمیشن کو 464 تک امیدواروں کی ضرورت تھی۔
کمیشن کی جانب سے نتائج کا اعلان کیے جانے کے بعد سوشل میڈیا پر شواہد کے بغیر ہزاروں صارفین نے کمیشن پر میونسپل افسران کے عہدے فروخت کرنے کا الزام عائد کیا تھا اور ساتھ ہی سوشل میڈیا صارفین نے نشاندہی کی تھی کہ پشتون قبیلے آفریدی کے امیدوار کو بھی دیہی سندھ سے کامیاب قرار دیا گیا۔
سندھ پبلک سروس کمیشن پر میونسپل افسران کے عہدے فروخت کرنے کا الزام
سوشل میڈیا صارفین نے شواہد کے بغیر سندھ پبلک سروس کمیشن پر الزامات عائد کرتے ہوئے دعویٰ کیا کہ کمیشن نے پیسوں کے عوض نتائج کو تبدیل کردیا۔#SPSC #SindhGovt #SindhMatters #SindhTalent https://t.co/oIb21UKiAV— Sindh Matters – سندھ میٹرز (@SindhMatters) October 21, 2023
کمیشن پر شدید الزامات کے بعد بعض امیدواروں نے سندھ ہائی کورٹ سے رجوع کرنے کا فیصلہ بھی کیا تھا لیکن اب کمیشن نے خود پر لگے الزامات پر وضاحت کی ہے۔
سندھ پبلک سروس کمیشن کی جانب سے جاری کردہ بیان میں بتایا گیا کہ میونسپل افسر کے خالی 464 عہدوں کے لیے ایک لاکھ 5 پزار 748 امیدواروں نے تحریری امتحان دیا تھا، جس میں سے 1440 امیدواروں نے ٹیسٹ پاس کیا تھا۔
کمیشن کے مطابق تحریری امتحان پاس کرنے والے امیدواروں میں سے صرف 418 امیدواروں کو زبانی انٹرویو میں پاس قرار دے کر انہیں عہدوں پر تعینات کرنے کی سفارش کی گئی جب کہ 46 عہدے موزوں امیدوار نہ ہونے کی وجہ سے خالی چھوڑے گئے جو کہ کمیشن کی میرٹ کو یقینی بنانے کی نشانی ہے۔
سندھ پبلک سروس کمیشن پر میونسپل افسران کے عہدے فروخت کرنے کا الزام
صارفین نے امیدواروں کی فہرست میں دوسرے صوبے کے لوگوں کی نشاندہی بھی کی اوربتایاکہ آفریدی قبیلےکے پشتون کودیہی سندھ سے کامیاب قرار دیا گیا ہے۔#sindhrejectsbogusMOresultbySPSC #SindhMatters https://t.co/oIb21UKQqt— Sindh Matters – سندھ میٹرز (@SindhMatters) October 22, 2023
کمیشن کے مطباق بعض ایسے امیدواروں کو بھی کامیاب قرار دیا گیا جنہوں نے پی ایس ٹی اور جے ایس ٹی کے ٹیسٹ بھی پاس کر رکھے ہیں اور کمیشن میونسپل افسران کے عہدوں کو فروخت کرنے کے تمام الزامات کی تردید کرتا ہے۔
کمیشن نے اپنے بیان میں اس عزم کا اعادہ بھی کیا کہ وہ سوشل میڈیا پر اپنے خلاف چلنے والے پروپیگنڈے اور الزامات کو تسلیم نہیں کرے گا اور شفافیت کے لیے کام کرتا رہے گا۔
