سندھ میں اسمگل شدہ اسلحے کو لائسنس جاری کیے جانے کا انکشاف

سندھ میں اسمگل شدہ اسلحے کو ڈیلروں اور محکمہ داخلہ کی مدد سے لائسنس یافتہ بنائے جانے کا انکشاف سامنے آیا ہے۔

معاملہ وفاقی تحقیقاتی ادارے (ایف آئی اے) کی جانب سے حیدرآباد میں محکمہ داخلہ سندھ کے لائسنس انسپکٹر کے گھر پر چھاپہ مارنے کے بعد سامنے آیا۔

ویب سائٹ ایکسپریس کے مطابق محکمہ داخلہ کے ذرائع کا کہنا ہے کہ ایف آئی اے نے اسمگل شدہ اسلحے کو قانونی بنانے کے معاملے پے محکمہ داخلہ سے وضاحت طلب کرلیجبکہ محکمہ کے حکام وضاحت دینے کے لئے لیت ولعل سے کام لینے لگے۔

ایف آئی اے کی جانب سے حیدرآباد میں ایک کسٹم انسپیکٹر کے گھر پر چھاپہ مارا گیا،چھاپے میں 67 لائسنس یافتہ اسلحہ ملا، تفتیش پر انکشاف ہوا کہ 23 اسلحے اسمگل شدہ تھے۔

ذرائع محکمہ داخلہ کے مطابق ڈیلروں نے اپنی دکان کا اسٹیمپ لگاکر اسلحہ دیا اور محکمہ داخلہ سندھ نے اسلحہ ڈیلر کے اسٹیمپ پر لائسنس جاری کردیا۔

محکمہ داخلہ سے جواب طلبی کی گئی تو محکمہ داخلہ نے کوئی جواب نہیں دیا۔

ایف آئی اے حکام نے معاملے پر عدالت سے درخواست کرنے پرغورشروع کردیا، عدالت سے استدعا کی جائے گی کہ محکمہ داخلہ سندھ سے جواب طلبی کرے۔