دیگر صوبوں اور ممالک سے آنے والے لوگ سندھ کی آبادی کے لیے مسئلہ ہیں، وزیر اعلیٰ

وزیر اعلیٰ سندھ سید مراد علی شاہ کا کہنا ہے کہ شرح پیدائش میں اضافہ اور دوسرے صوبوں و ممالک سے ہجرت کرکے آنے والے لوگوں کی وجہ سے سندھ کی آبادی مسلسل بڑھ رہی ہے اور وسائل محدود ہوتے جارہے ہیں۔

پاپولیشن ٹاسک فورس کے اجلاس کی صدارت کرتے ہوئے وزیراعلیٰ سندھ نے کہا کہ ملک کی آبادی میں تیزی سے ہوتا ہوا اضافہ تشویشناک ہے اس لیے آبادی کے حوالے سے ٹاسک فورس کا یہ اجلاس انتہائی اہم ہے۔

انہوں نے کہا کہ آبادی میں اضافے کی شرح 2.55 فیصد ہے جس کے مطابق ملک کی مجموعی آبادی 24 کروڑ 10 ہے جبکہ سندھ کی آبادی ساڑھے 5 کروڑ سے زائد ہے۔

ان کا کہنا تھا کہ شرح پیدائش میں اضافے، دیگر صوبوں اور ممالک سے آنے والوں کی وجہ سے سندھ کو آبادی کے مسئلے کا سامنا ہے۔

مراد علی شاہ کا کہنا تھا کہ آبادی میں تیزی سے ہونے والے اضافے کے باعث روزگار کے مواقع، صحت و تعلیمی سہولیات سمیت خوراک اور رہائش جیسے مسائل چیلنج بنتے جارہے ہیں۔

پاپولیشن ٹاسک فورس کے اجلاس میں بڑھتی ہوئی آبادی کے مسئلے پر تشویش کا اظہار کرتے ہوئے انہوں نے کہا کہ آبادی اور وسائل کے درمیان توازن پیدا کرنا ضروری ہے۔