سال 2024: سندھ بھر میں 1842 قتل، ریپ کے 668 کیسز رپورٹ، قتل میں لاڑکانہ سر فہرست
سال 2024 میں سںندھ بھر میں مختلف واقعات کے اندر 1842 افراد قتل ہوئے جب کہ صوبے بھر میں ریپ اور گینگ ریپ کے 668 واقعات رپورٹ ہوئے۔
سال 2024 میں ذاتی دشمنی سمیت مختلف واقعات کے قتل اور کاروکاری کے قتل میں بھی لاڑکانہ رینج سر فہرست رہا۔
ریپ اور گینگ ریپ کے واقعات میں کراچی ڈویژن کا ایسٹ زون سر فہرست رہا۔
سندھ پولیس کی سال 2024 کی رپورٹ کے مطابق سال بھر میں صوبے میں ریپ کے 362 کیسز رپورٹ ہوئے، سب سے زیادہ کیسز کراچی ڈویژن کے ایسٹ زون میں ہوئے جن کی تعداد 97 رہی۔
گینگ ریپ کے 58 واقعات رپورٹ ہوئے، کراچی ڈویژن کے ایسٹ زون میں سب سے زیادہ گینگ ریپ کے 35 واقعات رپورٹ ہوئے۔
اسی طرح بدفعلی کے 248 واقعات رپورٹ ہوئے،کراچی کے ایسٹ زون میں بدفعلی کے سب سے زیادہ 90 واقعات رپورٹ کیے گئے۔
سال بھر میں مختلف واقعات میں قتل کے 1842 واقعات رپورٹ ہوئے، کاروکاری کے 133، ریپ اور گینگ ریپ کے 668، اغواہ ،اغواہ برائے تاوان اور بچوں کے اغوا کے 4940 واقعات رپورٹ ہوئے۔
سال 2024 میں سندھ کے مختلف علاقوں میں قتل کے 1842 واقعات رپورٹ ہوئے، قتل کے سب سے زیادہ واقعات لاڑکانہ رینج میں ہوئے جن کی تعداد 470 رہی۔
جنوری میں 138 ، فروری میں 135 ،مارچ میں 141 ، اپریل میں 187 ، مئی میں 171 ، جون میں 181 ، جولائی میں 193 ، اگست میں 169 ، ستمبر میں 144 ، اکتوبر میں 143 ، نومبر 112 اور ماہ دسمبر میں قتل کے 128 واقعات رپورٹ ہوئے۔
اسی طرح سندھ بھر میں کاروکاری کے 133 واقعات رپورٹ ہوئے، کاروکاری کے سب سے زیادہ واقعات لاڑکانہ رینج میں ہوئے جن کی تعداد 78 رہی۔
جنوری میں 7 ، فروری میں 5 ، مارچ میں 7 ، اپریل میں 14 ، مئی میں 12 ، جون میں 16 ، جولائی میں 16 ، اگست میں 10 ، ستمبر میں 12 ، اکتوبر میں 15 ، نومبر میں 9 اور دسمبر میں کاروکاری کے 10 واقعات رپورٹ کیے گئے۔
سال 2024 میں صوبے بھر میں اغوا کے 4 ہزار 365 واقعات رپورٹ ہوئے۔
پولیس کے اعداد وشمار کے مطابق اغوا کے سب سے زیادہ واقعات کراچی ڈویژن کے ایسٹ زون میں رپورٹ ہوئے جن کی تعداد 1645 ہے۔
اغوا برائے تاوان کے 132 واقعات رپورٹ ہوئے، سب سے زیادہ واقعات لاڑکانہ رینج میں رپورٹ ہوئے جن کی تعداد 57 رہی جبکہ بچوں کے اغوا کے 443 واقعات رپورٹ کیے گئے ۔
بچوں کے اغوا کے سب سے زیادہ واقعات کراچی ڈویژن کے ایسٹ زون میں رپورٹ ہوئے جن کی تعداد 251 رہی ۔
