سانگھڑ میں جونیجو برادری کے دو گروپوں میں تصادم، تین افراد قتل، 19 زخمی

سانگھڑ کے قصبے چوٹیاریوں میں جونیجو قبیلے دو گروہوں کے مابین دیرینہ تصادم کے نتیجے میں فائرنگ سے 3 افراد قتل جب کہ کم سے کم 3 خواتین سمیت 19 سے زائد افراد زخمی ہوگئے.
سانگھڑ کے نزدیک چوٹیاریوں تھانے کی حدود میں گوٹھ جانی جونیجو میں کھیتوں میں مویشیوں کے گھس جانے سے جونیجو قبیلے کے دو گروپوں کے مابین تصادم کی وجہ سے اندھا دھند فائرنگ کی گئی۔
مقامی ذرائع کے مطابق دوران تصادم جونیجو قبیلے کے ایک اسلحہ سے لیس گروپ نے اپنے مخالف گروپ پر اندھا دھند سیدھی فائرنگ شروع کی جس کے نتیجے میں تین افراد علی بخش جونیجو، مشتاق علی اور عبدالرسول جونیجو جاں بحق جبک تین خواتین سمیت 19سے زائد افراد زخمی ہوگئے۔
زخمیوں میں سیف اللہ جونیجو، عبداللہ، قادر جونیجو، نوازعلی، عاشق حسین، لال بخش، عبدالسلام، اسد، امام الدین، عباس، اویس، ضامن، ارباب، قدیر، غلام رسول، نوید علی، مسماۃ زبیدہ، مسماۃ ساجدہ اور مسمات عظمی کے نام شامل بتائے جاتے ہیں ۔
اطلاع ملنے پر پولیس کی بھاری نفری جائے وقوع پر پہنچی، پولیس نے تینوں ڈیڈ باڈیز سمیت تمام زخمیوں کو سول اسپتال سانگھڑ منتقل کیا۔
مذکورہ واقعے کے نتیجے میں صورتحال کنٹرول سے باہر ہوگئی، پورے علاقے میں خوف و ہراس کی کیفیت طاری جبکہ دوسری جانب رونما واقعے کے بعد نامعلوم مسلح افراد نے ٹائر جلا کر سانگھڑ، میرپور خاص، سانگھڑ، نواب شاہ اور سانگھڑ، حیدراباد روڈ بلاک کر دیا جس کے نتیجے میں ٹریفک مکمل طور پر جام اور گاڑیوں کی لمبی قطاریں لگ گئیں۔
علاوہ ازیں نامعلوم مسلح افراد نے اسلحہ کی مدد سےاندھا دھند ہوائی فائرنگ کر کے شہر کے مختلف کاروباری مراکز بند کروا دیے۔