دنیا کے طویل القامت افراد میں شامل نصیر سومرو شکار پور میں انتقال کر گئے
دنیا کے طویل القامت افراد میں شامل نصیر سومرو شکارپور میں انتقال کرگئے۔
ان کے بھائی ریاض سومرو کے مطابق 55 سالہ نصیر سومرو کئی ماہ سے پھیپھڑوں کے عارضے میں مبتلا تھے اور ان کا گھر میں علاج جاری تھا۔
نصیر سومرو کا قد 7 فٹ 9 انچ تھا اور ان کا شمار دنیا کے طویل القامت افراد میں کیا جاتا تھا، دراز قد کی وجہ سے نصیر سومرو کو قومی ائیرلائن نے ملازمت بھی دے رکھی تھی۔
وزیر اعلی سندھ سید مراد علی شاہ نے نصیر سومرو کے انتقال پر گہرے دکھ اور افسوس کا اظہار کیا ہے۔
انہوں نے اپنے تعزیتی پیغام میں مرحوم نصیر سومرو کے ا ہلخانہ سے تعزیت کی اور ہمدردی کا اظہار کیا
وزیراعلیٰ سندھ نے مرحوم کو اپنی جوار رحمت اور اعلیٰ مقام مرحمت فرمانے اور لواحقین کو صبر جمیل عطا کرنے کی دعا دی۔
خیال رہے کہ پھیپھڑوں کے عارضے کی وجہ سے انہیں متعدد بار اسپتال بھی داخل کرایا گیا جب کہ 2019 کے وسط میں ان کے فوت ہوجانے کی خبریں بھی سوشل میڈیا پر وائرل ہوئی تھیں، ان دنوں وہ نجی اسپتال کے آئی سی یو میں زیر علاج تھے۔
نصیر سومرو کا قد 7 فٹ 9 انچ تھا اور وہ عام افراد سے کم سے کم تین فٹ لمبے تھے۔
نصیر سومرو نے 2 دہائیاں قبل سن 2000 میں کچھ وقت کے لیے دنیا کے لمبے ترین شخص کا اعزاز اپنے نام کیا تھا تاہم بعد ازاں دنیا کے دیگر ممالک سے ان سے بھی بڑے قد والے شخص سامنے آ ئے تھے.
صوبہ سندھ کے شمالی ضلع شکارپور سے تعلق رکھنے والے 55 سالہ نصیر سومرو بعد ازاں جہاں دنیا کے طویل شخص نہیں رہے تھے، وہیں پاکستان میں بھی ان سے دراز قد لوگ سامنے آئے اور 2018 تک وہ پاکستان کے دوسرے دراز قد شخص تسلیم کیے جانے لگے تاہم ان کا اپنا دعویٰ تھا کہ وہ ملک کے سب سے لمبے شخص تھے۔
نصیر سومرو کو دراز قد کی وجہ سے دنیا بھر میں شہرت حاصل رہی اور انہوں نے امریکا سمیت دنیا کے متعدد ممالک کے دورے بھی کیے۔
دراز قد کی وجہ سے نصیر سومرو کو پاکستان انٹرنیشنل ایئرلائن (پی آئی اے) نے ملازمت بھی دے رکھی تھی تاہم وہ گزشتہ چند سال سے اپنے ادارے سمیت حکومتی عدم توجہی کے باعث کسم پرسی کا شکار رہے۔
