سندھ اسمبلی میں حکومتی و اپوزیشن ارکان کو مراعتیں دینے کا بل منظور

سندھ اسمبلی نے ارکان اسمبلی کی تنخواہوں اور مراعات میں اضافے کا بل منظور کر لیا.

ایوان نے سندھ بورڈز آف انٹر میڈیٹ و سیکنڈری ایجوکیشن (ترمیمی) بل 2025 اور اینٹی ٹیررازم سندھ ترمیمی بل 2025 بھی منظور کر لیا.

سندھ اسمبلی نے 8 اگست کو 3 اہم بلوں کی منظوری دی، یہ بل وزیر قانون اور پارلیمانی امور ضیاءالحسن لنجار کی جانب سے ایوان میں پیش کئے تھے۔

سندھ اسمبلی کا اجلاس اسپیکر سید اویس قادر شاہ کی زیر صدارت شروع ہوا۔

ایوان کی کارروائی کے دوران وزیر قانون و پارلیمانی امور ضیاءالحسن لنجار نے ارکان سندھ اسمبلی کی تنخواہوں اور الاؤنسز میں اضافے سے متعلق بل ایوان میں پیش کیاجس کی ایوان نے مرحلہ وار منظوری دی۔

تمام ممبران نے بل کی حمایت کی اور اسے متفقہ طور پر منظور کرلیا گیا۔

سندھ کابینہ نے 7 اگست کو اپنے اجلاس میں اس بل کے مسودے کی منظوری دی تھی اور کابینہ کی منظوری کے بعد اب اسے سندھ اسمبلی سے بھی منظور ی حاصل ہوگئی۔

منظور شدہ قانون سے حکومت اور اپوزیشن دونوں جانب کے ارکان اسمبلی یکساں طور پر مستفید ہوں گے اور وہ بہت سی مراعات کے حقدار بھی تصور کئے جائیں گے۔

ارکان مہمان داری الاؤنس، ہاؤس رینٹ الاؤنس، یوٹلیٹی الاؤنس، ڈیلی الاؤنس، کنوینس الاؤنس، اکاموڈیشن الاؤنس، ٹریولنگ الاؤنس، مائیلج الاؤنس، مفت سفری سہولت ، ٹیلی فون کی سہولت، علاج معالجے کی سہولیات، آفس مینٹنس الاؤنس اور وہ تما م الاؤنسز بھی حاصل کر سکیں گے جن کی سفارش سندھ اسمبلی کی کوئی پارلیمانی کمیٹی کرے گی ۔