سندھ میں 10 ہزار مفت الیکٹرک موٹر سائیکلوں کی تقسیم کی اسکیم کا آغاز

سندھ حکومت نے خواتین کو بااختیار بنانے اور ان کے لیے محفوظ و باوقار سفری سہولت فراہم کرنے کے مقصد سے ورکرز ویلفیئر بورڈ کے تحت 10 ہزار مفت الیکٹرک موٹر سائیکلوں کی اسکیم کا آغاز کردیا۔

وزیر محنت سندھ، شاہد تھہیم کے مطابق خواتین صنعتی مزدور اب اپنی رجسٹریشن ورکرز ویلفیئر بورڈ کی آفیشل ویب سائٹ پر کروا سکتی ہیں۔ انہوں نے کہا کہ قرعہ اندازی جدید ڈیجیٹل نظام کے تحت ہوگی جس میں انسانی مداخلت کا کوئی امکان نہیں ہوگا۔

اہلیت کے معیار کے مطابق، 20 سے 45 سال کی خواتین درخواست دینے کی اہل ہیں، جبکہ 20 فیصد کوٹہ اقلیتی برادری کے لیے مختص کیا گیا ہے۔ اسکیم کی ایک اہم شرط یہ ہے کہ موٹر سائیکل سات سال تک لازمی طور پر رکھنی ہوگی۔ ساتھ ہی، ڈرائیونگ لائسنس کے لیے 60 دن کی مہلت دی جائے گی۔

شاہد تھہیم کا کہنا تھا کہ خواتین ملک کی نصف آبادی سے زیادہ ہیں اور ان کی ترقی کے بغیر ملک کی ترقی ناممکن ہے۔ یہی سوچ اس اسکیم کی بنیاد ہے۔ انہوں نے مزید کہا کہ اس اقدام کا مقصد صرف ٹرانسپورٹ فراہم کرنا نہیں بلکہ روزمرہ اخراجات میں کمی، ماحول دوست ٹیکنالوجی کا فروغ، خواتین اور اقلیتوں کی مساوی شمولیت کو یقینی بنانا ہے۔

وزیر محنت نے اقلیتوں کے حوالے سے کہا کہ پاکستان کے پرچم کا سفید رنگ ان کے مساوی حقوق اور قربانیوں کی علامت ہے، اور اس اسکیم میں ان کی شمولیت انہی قربانیوں کا اعتراف ہے۔

یہ منصوبہ سندھ حکومت اور چیئرمین بلاول بھٹو زرداری کی وژنری قیادت کا عکاس قرار دیا جارہا ہے، جسے ناقدین خواتین اور اقلیتوں کی خودمختاری کی جانب ایک "خاموش انقلاب” قرار دے رہے ہیں۔

درخواست جمع کرانے کے لیے آفیشل ویب سائٹ: www.wwbsindh.gov.pk/emotorcycle پر درخواست دی جا سکتی ہے۔