ایم کیو ایم اور پی پی کا معاہدے کے تحت ساتھ چلنے پر اتفاق
صوبائی حکمران جماعت پاکستان پیپلز پارٹی (پی پی پی) اور متحدہ قومی موومنٹ (ایم کیو ایم) نے ایک دوسرے کے ساتھ کیے گئے معاہدوں کے مطابق آگے بڑھنے اور تمام معاملات اتفاق رائے سے حل کرنے پر اتفاق کرلیا۔
ایک ساتھ آگے بڑھنے کے لیے اتفاق رائے پیدا کرنے سے متعلق دونوں جماعتوں کے اہم رہنمائوں نے مشترکہ اجلاس کیا، اس ضمن میں ایم کیو ایم کے وفد اور پیپلزپارٹی کے وفد نے معاملات کو بات چیت اور معاہدے کے تحت لیکر چلنے پر ایک بار پھر اتفاق کرلیا، ایم کیو ایم رابطہ کمیٹی اور پیپلزپارٹی کی قیادت فیصلوں کی حتمی منظوری دے گی۔
ایکسپریس نیوز کے مطابق وزیراعلیٰ سندھ مراد علی شاہ سے ایم کیو ایم پاکستان کے کنوینر خالد مقبول صدیقی نے وفد کے ہمراہ ملاقات کی، جس میں گورنر سندھ کامران ٹیسوری سمیت وفاقی وزیر فیصل سبزواری، خواجہ اظہار الحسن، سابق وفاقی وزیر قانون فروغ نسیم اور سابق میئر کراچی وسیم اختر شامل تھے جب کہ وزیراعلیٰ سندھ کے ساتھ صوبائی وزراء سعید غنی ، شرجیل میمن، وقار مہدی اور مرتضیٰ وہاب شامل تھے۔
ملاقات میں ایم کیو ایم اور پیپلز پارٹی کےدرمیان ورکنگ رلیشن شپ کو مزید بہتر کرنے پر اتفاق کیا گیا، اجلاس میں کراچی کے ترقیاتی منصوبوں اور شدید بارشوں سے متاثر انفراسٹرکچر کی تعمر نو پر بھی بات چیت کی گئی۔
اجلاس میں دونوں جماعتوں نے شہر کے مسائل ترجیحی بنیادوں پر حل کرنے پر اتفاق کیا جب کہ ایم کیو ایم اور پیپلزپارٹی کے درمیان ہونے والے معاہدے پر عملدرآمد کو یقینی بنانے پر تفصیلی گفتگو کی گئی۔
