محقق و لکھاری گل حسن کلمتی عارضہ جگر میں مبتلا
فوٹو: فیس بک
معروف محقق، مورخ و لکھاری گل حسن کلمتی عارضہ جگر میں مبتلا ہوگئے، جنہیں علاج کے لیے دارالحکومت کراچی کے نجی میمن اسپتال میں داخل کرادیا گیا۔
محقق اور لکھاری کے قریبی دوستوں نے سندھ میٹرز کو بتایا کہ گل حسن کلمتی گزشتہ کچھ عرصے سے علیل تھے، جس وجہ سے انہوں نے نومبر 2022 کے بعد ادبی و سماجی سرگرمیوں میں حصہ لینا بھی کم کردیا تھا۔
لکھاری کے دوستوں کے مطابق دسمبر 2022 کے بعد گل حسن کلمتی کی طبیعت بہت زیادہ ناساز ہوگئی اور وہ بستر پر آگئے، جس کے بعد کچھ دن پہلے ہی انہیں میمن اسپتال داخل کرایا گیا، جہاں ان کے ابتدائی ٹیسٹ ہونے کے بعد ان کا علاج شروع کردیا گیا۔
گل حسین کلمتی کے علیل ہونے پر سندھ بھر کے ادیبوں، محققین، سماجی رہنمائوں اور سیاستدانوں سمیت طلبہ نے بڑے پیمانے پر تشویش کا اظہار کرتے ہوئے حکومت سندھ سے مطالبہ کیاکہ ان کا علاج بہتر اسپتالوں اور بیرون ممالک سے بھی کرایا جائے۔
سندھ بھر کے عوام نے گل حسن کلمتی کی اسپتال کے بسترے کی تصاویر شیئر کرتے ہوئے حکومت سندھ سے ان کے بہتر علاج کا مطالبہ کیا۔
گل حسن کلمتی کے اسپتال داخل ہونے کی خبر سننے کے بعد متعدد شخصیات ان کی عیادت کے لیے اسپتال پہنچیں اور انہیں تعاون کی مکمل یقین دہانی کروائی۔
گل حسن کلمتی کو صوبائی دارالحکومت کراچی کے حوالے سے تحقیقی کام سامنے لانے پر شہرت حاصل ہے، انہیں کراچی کے لافانی کرداروں میں شمار کیا جاتا ہے، انہوں نے متعدد تاریخی کتابیں لکھیں، تاہم ان کی سب سے مشہور کتاب کراچی سندھ جی مارئی ہے، جس میں انہوں نے صوبائی دارالحکومت کی تاریخ کو جدید انداز میں پیش کیا۔
گل حسن کلمتی 5 جولائی 1957 کو کراچی ڈویژن کے قصبے گڈاپ کے چھوٹے سے گاؤں گولاپ میں پیدا ہوئے، اس وقت حاجی رضی بلوچ گاؤں گولاپ ضلع ٹھٹھہ میں تھا، ایوب کے دور میں 1963 میں گڈاپ کو ضلع ملیر میں شامل کیا گیا، جس میں ملیر کے دیگر 37 گاؤں کو بھی شامل کیا گیا۔ گل حسن کلمتی کے والد محمد خان ایک مزدور تھے، جبکہ اس دور میں گل حسن کے والد ے اپنی محنت سے 15 روپے کمائے، جس سے انہوں نے کراچی کی پرانی سبزی منڈی میں ایک دکان خریدی، جہاں سے انہوں نے اپنے ذریعے گل حسن اور 9 بہن بھائیوں کی کفالت کی۔
گل حسن کملتی نے اپنے ہی خاندان سے شادی کی، جس سے ان کی ایک بیٹی، جس نے ایم اے سوشیالوجی کی ڈگری حاصل کی۔ گل حسن نے زمانہ طالب علمی میں ہی ادبی دنیا میں قدم جمائے۔ انہوں نے 1974 میں ایس ایم آرٹ کالج کراچی میں داخلہ لیا اور کالج سے شائع ہونے والے ادبی میگزین میں سندھی ادب پر لکھا اور اس کالج میں سندھی ادبی حلقہ بنایا۔
بعد ازاں انہوں نے کراچی سے ایک سندھی اخبار میں لکھنا شروع کیا۔گل حسن کلمتی نے 1979 میں کراچی یونیورسٹی میں صحافت میں داخلہ لیا، جہاں سے 1983 میں ماسٹر کی ڈگری مکمل کی۔ اس وقت جامعہ کراچی کے اس شعبہ میں صرف دو سندھی طالب علم تھے، ان میں سے ایک وہ خود تھے اور دوسرے مرحوم جمال ابڑو کے بیٹے اظہر ابڑو جو بدر ابڑو کے بھائی ہیں۔
گل حسن کلمتی نے نیشنل اسٹوڈنٹ فیڈریشن (NSF) کے ذریعے طلبا کی سیاسی نشو و نما کی، تاہم 1983 میں انہوں نے بلوچ اسٹوڈنٹ آرگنائزیشن (BSO) میں شمولیت اختیار کی اور اس کے بعد سے BSO سے ان کے اختلافات صرف اس وجہ سے تھے کہ وہ بلوچستان کی بات کرتے تھے اور کسی بھی قسم کے دفاع سے دور تھے۔
بعد ازاں گل حسن نے رسول بخش پلیجو کی عوامی تحریک میں بطور ہمدرد کام کیا، گل حسن کلمتی نے 1984 میں سندھ محاذ میں شمولیت اختیار کی، جس کے چیئرمین عبدالواحد آریسر تھے، جس کے بعد انہوں نے 1990 میں اس تنظیم کو بھی خیرباد کہہ دیا، بعد ازاں وہ سندھ ترقی پسند پارٹی (ایس ٹی پی) میں بھی شامل رہے۔
گل حسن نے کراچی کے دیہی علاقوں میں سندھ ترقی پسند پارٹی کے ہاتھ مضبوط کیے، جس میں ان کے بہنوئی رحیم بلوچ بھی ان کے ساتھ تھے۔ گل حسن کلمتی نے ایس ٹی پی کو چند سال دینے کے بعد سیاست کو ہمیشہ کے لیے الوداع کہہ دیا۔
بعد ازاں گل حسن کلمتی نے کراچی سے سندھ کی آواز بن کر ابھرنے والے روزنامہ ’عوامی آواز‘ کے صفحات میں لکھنا شروع کیا، کراچی کے دیہی علاقوں کی تاریخ اور اس کے علم، تاریخی مقامات، مقامات، قبائل اور علاقے کے جغرافیہ نے عوامی آواز کے پلیٹ فارم سے اپنے قارئین کو وسیع معلومات فراہم کی، جس کے بعد سندھ کے محکمہ ریونیو نے ان کی جمع کی گئی معلومات کو اپنے ریکارڈ کا حصہ بنایا، جو آج بھی روزنامہ عوامی آواز اور گل حسن کلمتی کے لیے اعزاز ہے۔
