سندھ اسمبلی تحلیل کردی گئی
گورنر سندھ کامران ٹیسوری نے وزیراعلیٰ سندھ مراد علی شاہ کی ایڈوائس پر سندھ اسمبلی توڑ دی۔
وزیراعلیٰ سندھ مراد علی شاہ نے آج سندھ اسمبلی توڑنے کی سمری پر دستخط کیے تھے اور وہ سمری خود لےکر گورنر ہاؤس پہنچے تھے۔
گورنر سندھ کامران ٹیسوری نے سندھ اسمبلی توڑنے کی سمری پر دستخط کردیے جس کے ساتھ ہی صوبائی کابینہ تحلیل ہوگئی۔
ترجمان گورنر کے مطابق گورنر سندھ نے وزیراعلیٰ کی سفارش پر آرٹیکل 112 شق نمبر ایک کے تحت سمری پردستخط کیے۔
سندھ اسمبلی چار سال 11 ماہ اور 29 دن قائم رہی۔
مدت مکمل ہونے سے قبل اسمبلی ٹوٹنے پر 3 دن میں وزیراعلیٰ سندھ مراد علی شاہ اور اپوزیشن لیڈر نے نگران وزیراعلیٰ کیلئے مشاورت کرنی ہے۔
آج سندھ اسمبلی کا الوداعی اجلاس ہوا جس کی صدارت اسپیکر آغا سراج درانی نے کی جبکہ حکومتی اور اپوزیشن ارکان نے بھی اجلاس سے خطاب کیا۔
خطاب کرتے ہوئے وزیراعلیٰ نے کہا کہ ہم نے تعلیم و صحت کےمنصوبوں میں اہم کام کیے ہیں، سندھ میں 60 ہزار سے زائد اساتذہ بھرتی کیےگئے، کل پہلی بار سندھ میں میوزک ٹیچرز بھرتی کیے گئے، تھر میں چھوٹے ڈیم بنائے اور زراعت کو بہتر کیا، تھر کے کوئلے سے بجلی بنا رہے ہیں۔
مراد علی شاہ نے متحدہ قومی موومنٹ (ایم کیو ایم) پاکستان کو مشورہ دیتے ہوئے کہا کہ آپ لوگ الیکشن لڑیے گا، فیلڈ خالی نہیں چھوڑیے گا۔
