کشمور و کیماڑی سے پولیو کیسز رپورٹ، سندھ میں کیسز کی تعداد 17 ہوگئی

ضلع کشمور اور کیماڑی سے ایک ایک پولیو کیس رپورٹ ہونے کے بعد سندھ میں اب تک سامنے آنے والے کیسز کی مجموعی تعداد 17 جب کہ ملک بھر کے کیسز کی تعداد 59 ہوگئی۔

نیشنل انسٹی ٹیوٹ آف ہیلتھ میں پولیو کے خاتمے کے لیے ریجنل ریفرنس لیبارٹری نے پاکستان بھر میں وائلڈ پولیو وائرس ٹائپ 1 (WPV1) کے تین کیسز کی تصدیق کردی۔

لیب نے کراچی کیماڑی، کشموراورڈی آئی خان سے ایک ایک پولیو کیس کی تصدیق کی۔بچوں سے جمع کیے گئے نمونوں کی جینیاتی ترتیب سے پتہ چلتا ہے کہ وہ جینیاتی طور پر اسی WPV1 وائرس کے جینیاتی کلسٹر سے جڑے ہوئے ہیں۔

مذکورہ کیسز کے بعد ملک بھر کے کیسز کی تعداد 59 جب کہ سندھ کے کیسز کی تعداد 17 ہوگئی۔

ضلع کشمور سے پہلا جب کہ کیماڑی سے یہ تیسرا کیس ہے۔

سندھ کے 20 اضلاع پولیو کے خطرے سے دوچار، 66 فیصد ماحولیاتی نمونوں میں وائرس کی تصدیق

اس وقت تک سندھ میں سب سے زیادہ کراچی ڈویژن سے پولیو کیسز رپورٹ ہوئے ہیں، دارالحکومت کراچی کے کیماڑی ضلع سے تین، ملیر اور ضلع شرقی سے ایک ایک کیس رپورٹ ہوا ہے، یعنی کراچی ڈویژن سے مجموعی طور پر پانچ کیسز سامنے آ چکے ہیں۔

پولیو کیسز کے حوالے سے دوسرے نمبر پر لاڑکانہ ڈویژن ہے، جہاں ضلع جیکب آباد سے دو، شکارپور سے ایک، کشمور سے ایک اور گھوٹکی سے بھی ایک کیس سامنے آ چکا ہے۔

حیدرآباد ضلع اور ڈویژن سے دو پولیو کیسز سامنے آ چکے ہیں جب کہ میرپور خاص ڈویژن کے ضلع میرپور خاص سے ایک، سانگھڑ اور سجاول سے ایک کیس سامنے آ چکا ہے۔