ایک مچھر مار اسپرے مشین دینے کی نفیسہ شاہ کی تصویر وائرل

تصویر پر لوگوں نے طرح طرح کےتبصرے کیے—فوٹو: ٹوئٹر

پاکستان پیپلز پارٹی (پی پی پی) کی رکن قومی اسمبلی سیدہ نفیسہ شاہ کی جانب سے سیلاب متاثرین کے ریلیف کیمپس میں مچھر مار اسپرے کرنے کے لیے دی گئی اسپرے مشین کی تصویر سوشل میڈیا پر وائرل ہونے کے بعد لوگوں نے پیپلز پارٹی رہنما کو آڑے ہاتھوں لے لیا۔

سیدہ نفیسہ شاہ کا تعلق خیرپور سے ہے، جہاں بارشوں اور سیلاب نے تباہی مچادی ہے اور لاکھوں لوگ بے گھر ہو چکے ہیں۔

خود نفیسہ شاہ بھی اپنے شہر اور علاقے میں بارشوں اور سیلاب کی تباہ کاریوں کی تصاویر اور ویڈیوز شیئر کرتی رہی ہیں، جہاں دیہات کے دیہات ہی اجڑ گئے جب کہ خیرپور شہر سمیت کوٹ ڈیجی میں بھی تاحال پانی موجود ہے۔

انشاء اللہ اب کوئی مچھر نہیں بچے گا #FloodsInPakistan pic.twitter.com/xLvybpOsDO

— Sanjay Sadhwani (@sanjaysadhwani2) September 4, 2022

خیرپور کے لاکھوں لوگ بے گھر ہونے کے بعد اب روڈوں پر کھلے آسمان تلے برساتی اور سیلابی پانی میں زندگی گزارنے پر مجبور ہیں۔

پانی کے جمع ہوجانے سے صوبے کے دیگر علاقوں کی طرح خیرپور میں بھی مچھروں کا آزار بڑھ گیا ہے اور پیپلز پارٹی کی رہنما نفیسہ شاہ کی جانب سے بھی ایک مچھر مار اسپرے مشین دی گئی، تاکہ متاثرین کو مچھروں کے آزار سے بچایا جا سکے۔

ان سے بڑا مچھر کون ہے؟ https://t.co/tQYhiC1IVt

— Zahid Islam (@ZIMalik3) September 5, 2022

تصویر کو شیئر کرتے ہوئے سما ٹی وی کے صحافی سنجے سادھوانی نے طنزیہ انداز میں لکھا کہ اب کوئی مچھر نہیں بچے گا، جس پر کئی لوگوں نے طنزیہ تبصرے کیے اور نفیسہ شاہ کو آڑے ہاتھوں لیا۔

سنجے سادھوانی کی طرح سماجی کارکن سعید سانگری نے بھی نفیسہ شاہ کی مذکورہ تصویر شیئر کی اور کیپشن میں بتایا کہ جیلانی ہائوس میں ایک مچھر مار اسپرے کی مشین دینے کی تقریب۔

#خیرہور جیلانی ہائوس مین مچھر مار اسپرے مشین دینے کی تقریب،#SindhFloods2022 pic.twitter.com/6i0g33Ef86

— Saeed Sangri (@Sangrisaeed) September 4, 2022

تصویر میں سیدہ نفیسہ شاہ کو دیگر افراد کے ہمراہ ایک کمرے میں دیکھا جا سکتا ہے اور ٹیبل پر صرف ایک اسپرے مشین پڑی ہوئی ہے۔

مذکورہ تصویر سوشل میڈیا پر وائرل ہوگئی اور لوگوں نے اس پر طرح طرح کے تبصرے کرتے ہوئے کہا کہ اب خیرپور میں کوئی مچھر نہیں رہے گا۔

جو چیزیں، آلات و مشینری وافر مقدار میں ہونی چاہیئے. پیپلز پارٹی کی حکومت نے ان کو اتنا نایاب کیا ہوا ہے کہ لوگوں کو وہی سہولیات ملنے پر جشن منانا پڑتا ہے ۔ حالانکہ اداروں کے ماتحت Periodic Fumigation ہونی چاہیئے. https://t.co/gqm5vBR1rz

— Ayaz Channa 🇵🇰 (@channaayaz) September 5, 2022

ساتھ ہی لوگوں نے نفیسہ شاہ پر طنز کرتے ہوئے کمنٹس کیے کہ خیرپور کا عوام ایک مچھر مار اسپرے مشین فراہم کرنے پر ان کی مشکور ہے۔

بعض لوگوں نے مشورہ دیا کہ ایسی پروقار تقریب کے لیے نیچے ریڈ کارپٹ بچھایا جانا چاہیے تھا۔

ایسی پروقار تقریب ریڈ کارپٹ کے سوا بے رونق لگ رہی ہے۔ #FloodsInPakistan2022 #FloodinPakistan https://t.co/A8WqLY4Fu4

— Karam Ullah (@baparkaram) September 5, 2022

کچھ لوگوں نے لکھا کہ نفیسہ شاہ نے عوام کے لیے سچ میں بہت بڑی قربانی دی ہے۔